Taiwan – Verður Taiwan fyrsta Asíuríkið til þess að lögleiða hjónabönd samkynhneigðra?

Frettir Ríkisstjórn Taiwan undirbýr um þessar mundir löggjöf sem veita mun samkynhneigðum rétt til þess að ganga í hjónabönd. Verði lögin samþykkt verður Taiwan fyrsta Asíuríkið til þess að veita samkynheigðum slík réttindi.

Frumvarpið er hluti af víðtækri endurskoðun á mannréttindalöggjöf landsins og mun að öllum líkindum verða lagt fram á næstu mánuðum. Athygli hefur vakið að frumvarpið mun einnig veita samkynhneigðum pörum rétt til ættleiðinga: ?Til þess að tryggja mannréttindi samkynhneigðra er nauðsynlegt að lögleiða hjónabönd samkynhneigðra og viðurkenna fjölskyldulíf þeirra? er haft eftir embættismanni á forsetaskrifstofu landsins.

Ljóst er að nokkur ljón eru í veginum áður en lögin geta orðið að veruleika. Eins og áður sagði þá eru þau hluti af enn víðtækari áætlunum um bætt mannréttindi í landinu þar sem meðal annars er gert ráð fyrir algjöru afnámi dauðarefsinga. Mun sá hluti laganna vera þyrnir í augum nokkura ráðherra í ríkisstjórn landsins. Ekki er heldur ljóst á þessari stundu hvaða meðferð frumvarpið muni hljóta á löggjafarþinginu.

Samtök samkynhneigðra í Taiwan hafa að vonum fagnað mjög þessum áformum, en árétta jafnframt á að langur vegur sé eftir í réttindabaráttu samkynhneigðra þar í landi.

Heimild: BBC

-HTS