LEGGÐU GÓÐU MÁLEFNI LIÐ!

Menningarsjóður Landsbanka Íslands hefur veitt Samtökunum ´78 styrk að upphæð 1.000.000 kr. Stjórn Menningarsjóðs ákvað að tileinka úthlutun ársins þeim 75 málefnum og félögum sem eru í þjónustunni Leggðu góðu málefni lið í Einkabanka og Fyrirtækjabanka landsbankans. Hvert og eitt málefni var styrkt um eina milljón króna.

“Landsbankinn vill ganga á undan með góðu fordæmi og styrkir öll málefnin í þjónustunni, 75 að tölu. Við gerum ekki upp á milli þeirra en fólk sem notar þjónustuna getur hins vegar valið sér áskrift að því málefni sem því er kærast. Leggðu góðu málefni lið er einstakt framtak og þekki ég ekki dæmi um sambærilega þjónustu í alþjóðlegum bankaheimi” segir Björgólfur Guðmundsson, formaður bankaráðs Landsbankans.

Landsbankinn opnaði þjónustuna Leggðu góðu málefni lið í Einkabankanum 1. júlí á síðasta ári í tilefni af 120 ára afmæli bankans. Hægt er að velja á milli þess að styrkja gott mélefni með mánaðarlegri áskrift eða með einni greiðslu og er í báðum tilvikum hægt að velja þá upphæð sem viðkomandi kýs að leggja af mörkum. Markmiðið með þjónustunni er að bjóða almenningi auðvelda leið til þess að gerast áskrifendur að stuðningi við gott málefni og bæta þannig um leið það samfélag sem við búum í. Allt það fé sem safnast með þessum hætti til Samtakanna ´78 mun renna óskipt til þess að byggja upp fræðslu- og ráðgjafarstarf félagsins enn frekar.

Hægt er að gerast félagi í Samtökunum ´78 í gegnum þjónstuna Legðu góðu málefni lið. Þeir sem gerast áskrifendur að stuðningi við Samtökin ´78 fyrir 500 kr. eða meira á mánuði geta skráð sig sem félagar á heimasíðu félagsins. Stjórn Samtakanna ´78 vill hvetja fólk til þess að ganga til liðs við félagið með þessum hætti og stuðla þannig að öflugri og betri samtökum!

 Á vefsíðunni www.gottmalefni.is er að finna allar upplýsingar um þjónustuna. Þeir sem eru með heimabanka hjá Landsbanka Íslands geta tekið þátt.